දිවයිනේ සියලුම ප්‍රකාශනවල නෛතික තැන්පතුවක් ලෙස සේවය කරමින් ජාතික ලේඛනාරක්ෂක දෙපාර්තමේන්තුව 1973 අංක 48 දරන ජාතික ලේඛනාරක්ෂක නීතියට වඩා වැඩි කාර්යභාරයක් ඉටු කරයි. එබැවින්, ජාතික ලේඛනාරක්ෂක අධ්‍යක්ෂ ජනරාල්, පොත් සහ පුවත්පත් රෙජිස්ට්‍රාර්වරයා ලෙස ද කටයුතු කරයි. දිවයිනේ ප්‍රකාශයට පත් කෙරෙන පොත්පත් සහ පුවත්පත් ලියාපදිංචි කිරීම සහ රජයේ නෛතික තැන්පතුවක් පවත්වාගෙන යාම මෙම අංශයේ වගකීම වේ.
පුවත්පත් ලියාපදිංචි කිරීම, පුවත්පත් ලැයිස්තු සහ ඔවුන්ගේ මුද්‍රණාල ලියාපදිංචිය යාවත්කාලීන කිරීම සහ පුවත්පත් ලියාපදිංචි කිරීම මුද්‍රණාල පරීක්ෂා කිරීම, ප්‍රකාශන ලැයිස්තුව පරිගණක ගත කිරීම, මාසික ප්‍රකාශන ලියාපදිංචි කිරීම, ගැසට් සඳහා සූචියන් සකස් කිරීම වැනි කටයුතු ද මෙම අංශය මගින් සිදු කෙරේ.
1832 සිට මෙරට ප්‍රකාශයට පත් කරන ලද පොත්පත් සහ අනෙකුත් ලේඛන සහ පුවත්පත් ජාතික ලේඛනාගාරයේ තැන්පත් කර ඇත. 1885 සිට නෛතික තැන්පතු, 1832 සිට ශ්‍රී ලංකාවේ මුද්‍රණය කරන ලද පුවත්පත්, 1885 සිට දිවයිනේ මුද්‍රණය කරන ලද පොත් ඒ අතර වේ.
ශ්‍රී ලංකාව තුළ පවත්වාගෙන යනු ලබන සියලුම පුවත්පත් සහ මුද්‍රණාල, ලේඛනාරක්ෂක දෙපාර්තමේන්තුවේ ලියාපදිංචි කළ යුතුය. තවද, මුද්‍රණාල සහ ප්‍රකාශක ආඥාපනත යටතේ නිල ප්‍රකාශන ඇතුළුව සියලුම ප්‍රකාශනවල පිටපත් පහක් RBN 1 පෝරමය සමඟ ජාතික ලේඛනාරක්ෂක දෙපාර්තමේන්තුවට එවිය යුතුය. එක් පිටපතක් නෛතික තැන්පතුවක් ලෙස ජාතික ලේඛනාරක්ෂකාගාරයේ ගොනු කරනු ලැබේ. ඉතිරි පිටපත් එක බැගින් නෛතික තැන්පතුවක් ලෙස ජාතික පුස්තකාල හා ප්‍රලේඛන මධ්‍යස්ථානය, ජාතික කෞතුකාගාර පුස්තකාලයට, පේරාදෙණිය විශ්ව විද්‍යාලයේ පුස්තකාලය සහ රුහුණු විශ්වවිද්‍යාලයේ පුස්තකාලය වෙත යවනු ලැබේ.
පොත්පත් සහ පුවත්පත් ලියාපදිංචි කිරීමේ නීතිමය රාමුව
මුද්‍රණාල
මුද්‍රණශිල්පීන් සහ ප්‍රකාශකයන්
පුවත්පත්
• 1839 අංක 05 දරන ප්‍රවෘත්ති පත්‍ර ආඥාපනත.
• 1951 අංක 18 දරන ප්‍රවෘත්ති පත්‍ර සංශෝධන පනත.
• 1976 අංක 05 දරන ප්‍රවෘත්ති පත්‍ර සංශෝධන පනත.
ජාතික ලේඛනාරක්ෂක දෙපාර්තමේන්තුව තුළ මුද්‍රණාල ලියාපදිංචි කිරීම.
ඔබගේ මුද්‍රණාලය ජාතික ලේඛනාරක්ෂක දෙපාර්තමේන්තුව තුළ ලියාපදිංචි කළ යුත්තේ ඇයි?
මුද්‍රණාල ආඥා පනත (178 අධිකාරය), මුද්‍රණ ශිල්පීන්ගේ සහ ප්‍රකාශකයින්ගේ ආඥා පනත (179 අධිකාරය), ප්‍රවෘත්ති පත්‍ර ආඥා පනත (180 අධිකාරය) යටතේ ශ්‍රී ලංකාව තුළ පවත්වාගෙන යනු ලබන සියලු මුද්‍රණාල, ශ්‍රී ලංකා ජාතික ලේඛනාරක්ෂක දෙපාර්තමේන්තුව තුළ ලියාපදිංචි විය යුතුය. 2023.12.31 වන දින වන විට ලංකාව පුරා පිහිටි මුද්‍රණාල 2566 ක් අප ආයතනයේ ලියාපදිංචිව ඇත. ඔබේ මුද්‍රණාලයත් ජාතික ලේඛනාරක්ෂක දෙපාර්තමේන්තුව තුළ ලියාපදිංචි කර අනාගතයේ මුහුණ දීමට සිදුවන නීතිමය ගැටලු, අනන්‍යතාවය පිළිබඳ ගැටලු මග හරවා ගන්න.
ඒ සදහා ,
පියවර 1 :
I. ලේඛනාරක්ෂක දෙපාර්තමේන්තුවේ පොත් හා ප්‍රවෘත්ති පත්‍ර ලියාපදිංචි කිරීමේ අංශයට පැමිණ අදාළ ඩී. එන්. ඒ/12/II පෝරම පිටපත් තුනක් ලබාගත යුතුය. නැතහොත්,
II. ලේඛනාරක්ෂක දෙපාර්තමේන්තු නිල වෙබ් අඩවියෙන්, ඩී. එන්. ඒ/12/II පෝරමය බාගත කර පිටපත් තුනක් ලබා ගැනීම සිදු කිරීම (https://www.archives.gov.lk/resources/118/Printing Press.pdf) හෝ,
III. අධ්‍යක්ෂ ජනරාල්, ජාතික ලේඛනාරක්ෂක දෙපාර්තමේන්තුව, තැ. පෙ 1414, නො. 7, පිලිප් ගුණවර්ධන මාවත (රීඩ් මාවත), කොළඹ 7 යන ලිපිනයට අධ්‍යක්ෂ ජනරාල් වෙත තම මුද්‍රණාලය ලියාපදිංචිය සදහා අවශ්‍ය උපදෙස් සහ පෝරම ලබා දෙන ලෙස ඉල්ලුම් කළ හැක.
පියවර 2:
ඔබ විසින් අදාළ පෝරම මහේස්ත්‍රාත් අධිකරණය ඉදිරියේ අත්සන් කොට දිවුරුම් දීම සිදුකළ යුතුය. අනතුරුව මුද්‍රණාලය සම්බන්ධ අයදුම්පත, අධිකරණය විසින් ලේඛනාරක්ෂක දෙපාර්තමේන්තුව වෙත යොමු කරනු ලබයි. (ඔබ විසින් ලේඛනාරක්ෂක දෙපාර්තමේන්තුවේ නිල වෙබ් අඩවියෙන්, ඩී. එන්. ඒ/12/II පෝරමය බාගත කර ලියාපදිංචි කළහොත් පමණක්, මහේස්ත්‍රාත් අධිකරණය විසින් දෙපාර්තමේන්තු පිටපත එවනතෙක් ඔබ සතු පිටපතේ ඡා‍යා පිටපතක් ජාතික ලේඛනාරක්ෂක දෙපාර්තමේන්තුව වෙත එවීම සිදු කළ යුතුය.)
පියවර 3:
මුද්‍රණාලය සම්බන්ධයෙන් සිදු කළ ප්‍රකාශයේ එක් පිටපතක් ජාතික ලේඛනාරක්ෂක දෙපාර්තමේන්තුව වෙත ලැබුනු පසු ඔබගේ මුද්‍රණාලය ලියාපදිංචි කිරීම සහ අදාළ ලිපි ගොනු විවෘත කිරීම සිදු කරන අතර ඔබගේ මුද්‍රණාලය ලියාපදිංචි කළ බවටත්, ඉන්පසු මුද්‍රණාල හිමිකරු ක්‍රියාකළ යුතු ආකාරය පිළිබඳවත් දැනුවත් කරමින් ලේඛනාරක්ෂක දෙපාර්තමේන්තුව විසින් ඔබ වෙත ලිපියක් යොමු කරනු ලබයි.
මේ පිළිබද වැඩිදුර තොරතුරු දැනගැනීමට අවශ්‍ය වේ නම්, මෙම දුරකථන අංකය - 0112688755 ඔස්සේ අදාළ අංශයෙන් විමසීමක් සිදුකළ හැකිය.
පියවර 4: මුද්‍රණාලය ලියාපදිංචි වූ පසු,
1. මුද්‍රණාලයේ නම, මුද්‍රණාලයේ අයිතිය හෝ මුද්‍රණාලය පිහිටි ස්ථානයක වෙනසක් ඇති වන සෑම අවස්ථාවකදී ම ඒ බව මහේස්ත්‍රාත්වරයෙකු ඉදිරිපිට දී කරනු ලබන නව ප්‍රකාශයකින් මෙම දෙපාර්තමේන්තුවට දැන්විය යුතු ය.
2. එමෙන්ම තම මුද්‍රණාලය ස්ථිරව හෝ තාවකාලිකව වසා දමන්නේ නම් ඒ පිළිබඳව මෙම දෙපාර්තමේන්තුව වෙත ලිඛිතව දැනුම් දිය යුතු වේ.
3. මුද්‍රණය කරනු ලබන සෑම පොතක හෝ සඟරාවක හෝ පත්‍රිකාවක මුද්‍රණ ශිල්පියාගේ සම්පූර්ණ නම (මුද්‍රණාලයේ නම පමණක් ප්‍රමාණවත් නොවේ) ප්‍රකාශකයාගේ සම්පූර්ණ නම සහ පොත, සඟරාව හෝ පත්‍රිකාව ප්‍රසිද්ධ කරන ස්ථානය සඳහන් කළ යුතුය.
4. මුද්‍රණය කරනු ලබන හෝ මුද්‍රිත සෑම කොටසකම පිටපත් පහක් මුද්‍රණයෙන් නිකුත් කොට ලිත් මාසයක් ගතවන්නට පෙර අප වෙත එවිය යුතුය. විස්තර පත්‍රිකා යනුවෙන් සඳහන් ඩී. එන්. ඒ/12/III පෝරමය ද සම්පූර්ණ කර ඒ සමග එවිය යුතුය. (https://www.archives.gov.lk/resources/118/Monthly Decle.pdf)
5. සෑම මුද්‍රණ ශිල්පියකු විසින් ම සෑම මසකම පස් වෙනිදාට පෙර, ඉකුත් වූ මාසය තුළදී ඔහු විසින් මුද්‍රණය කරන ලද ප්‍රකාශන සම්බන්ධයෙන් ආර්. බී. එන් 3 පෝරමය පුරවා එවිය යුතුය. මුද්‍රණය කරන ලද සෑම පොතකම, කර්තෘගේ සහ ප්‍රකාශකගේ නම සහ ලිපිනය ද එහි සඳහන් විය යුතුය. කිසිම පොතක් මුද්‍රණය නොකළේ නම් එම පෝරමයේ කිසිවක් මුද්‍රණය නොකළ බව සඳහන් කර එවිය යුතුය. (අදාළ ආර්. බී. එන් පෝරම ලියාපදිංචි වූ පසු උපදෙස් පත්‍රිකා සමග එවනු ලබයි. අවශ්‍ය නම් දෙපාර්තමේන්තුවේ වෙබ් අඩවියෙන් බාගත කිරීමද සිදුකළ හැක. (https://www.archives.gov.lk/resources/118/Form of Particulars.pdf)
ජාතික ලේඛනාරක්ෂක දෙපාර්තමේන්තුව තුළ පුවත්පත් ලියාපදිංචි කිරීම
ඔබගේ පුවත්පත ජාතික ලේඛනාරක්ෂක දෙපාර්තමේන්තුව තුළ ලියාපදිංචි කළ යුත්තේ ඇයි?
ශ්‍රී ලංකාව තුළ මුද්‍රණය කරනු ලබන ඕනෑම පුවත්පතක් ජාතික ලේඛනාරක්ෂක දෙපාර්තමේන්තුව තුළ ලියාපදිංචි විය යුතුවේ.
ඒ සදහා,
පියවර 1:
ඔබගේ මුද්‍රණාලය, මුද්‍රණාල ආඥාපනතේ (178 අධිකාරය) 2 (1) වගන්තිය යටතේ මහේස්ත්‍රාත් අධිකරණයේ ගරු මහේස්ත්‍රාත්වරයෙකු ඉදිරියේ ප්‍රකාශයක් සිදු කර, ජාතික ලේඛනාරක්ෂක දෙපාර්තමේන්තුවේ පොත් සහ පුවත්පත් ලියාපදිංචි කිරීමේ අංශයේ ලියාපදිංචි වී තිබීම අනිවාර්ය වේ. (එයට අදාළ පියවර මුද්‍රණාල ලියාපදිංචි කිරීම යටතේ දක්වා ඇත.)
පියවර 2:
එම අවශ්‍යතාවය සපුරාලූ පසු, පුවත්පත ලියාපදිංචි කිරීම සදහා ජාතික ලේඛනාරක්ෂක දෙපාර්තමේන්තුවේ පොත් හා පුවත්පත් ලියාපදිංචි කිරීමේ අංශයට පැමිණ අදාළ ආර්. බී. එන්/7 පෝරම පිටපත් තුනක් ලබාගත යුතුය. නැතහොත්,
I. ලේඛනාරක්ෂක දෙපාර්තමේන්තු නිල වෙබ් අඩවියෙන් (https://www.archives.gov.lk/resources/118/News Paper Registretion Form.pdf) බාගත කරගැනීම සිදු කිරීම හෝ,
II. අධ්‍යක්ෂ ජනරාල්, ජාතික ලේඛනාරක්ෂක දෙපාර්තමේන්තුව, තැ. පෙ 1414, නො. 7, පිලිප් ගුණවර්ධන මාවත, කොළඹ 7 යන ලිපිනය යටතේ අධ්‍යක්ෂ ජනරාල් වෙත තම මුද්‍රණාලයේ විස්තර ඇතුලත් කොට උපදෙස් හා ආකෘති පත්‍ර අයදුම් කරමින් ලිපියක් යොමු කිරීම ද, සිදු කළ හැකිය.
පියවර 3:
ඉන්පසු පුවත්පත් ආඥා පනතේ (180 වැනි පරිච්ඡේදය) 2 වන වගන්තිය සහ ජාතික රාජ්‍ය සභාවේ 1976 අංක 5 දරණ ප්‍රවෘත්ති පත්‍ර පිළිබද ආඥා පනතේ සංශෝධිත පනත ද ප්‍රකාරව පුවත්පතේ අයිතිකරු, ප්‍රකාශක, සහ මුද්‍රණ ශිල්පියා දිසා අධිකරණයේ දිසා විනිසුරුතුමෙකු ඉදිරියේ ප්‍රකාශයක් කළ යුතු වේ.
පියවර 4:
දිසා අධිකරණයේ ගරු දිසා විනිසුරුතුමා ඉදිරියේ කරනු ලැබූ ප්‍රකාශය දිසා අධිකරණයේ රෙජිස්ට්‍රාර් මාර්ගයෙන් ලේඛනාරක්ෂක දෙපාර්තමේන්තුව වෙත ලැබීමට සලස්වන අතර ඉන් පසුව පොත් සහ පුවත්පත් ලියාපදිංචි කිරීමේ අංශය විසින් ඔබගේ පුවත්පත ලියාපදිංචි කිරීම සිදු කරනු ලබයි.
පියවර 5:
ලියාපදිංචිය සිදු වූ පසු ලේඛනාරක්ෂක දෙපාර්තමේන්තුව විසින් ලිපියකින් ඔබගේ පුවත්පත ලියාපදිංචි කළ බව ඔබට දැනුම් දීම සහ ඉදිරියට අදාළ උපදෙස් ලබාදීම සිදු කෙරේ.
මේ පිළිබද වැඩිදුර තොරතුරු දැනගැනීමට අවශ්‍ය වේ නම්, මෙම දුරකථන අංකය - 0112688755 ඔස්සේ අදාළ අංශයෙන් විමසීමක් සිදුකළ හැකිය.
පියවර 6:
පුවත්පත ලියාපදිංචි කළ පසු,
1. මුද්‍රණය කරනු ලබන සෑම කලාපයකම පිටපත් 02 ක්
I. එක් පිටපතක් මුද්‍රණකරුගේ අත්සන හෝ ප්‍රකාශකගේ අත්සන සහිතව ද
II. අත්සන් නොකළ පිටපතක් ද
පත්‍රය මුද්‍රණය කරනු ලැබූ දිනට පසුදින ම ලේඛනාරක්ෂක දෙපාර්තමේන්තුවට ලැබෙන්නට සැලැස්විය යුතුය.
2. පහත සදහන් අවස්ථාවලදී නව ප්‍රකාශන අත්සන් කොට ඉදිරිපත් කළ යුතු වේ.
I. මුද්‍රණකරු හෝ ප්‍රකාශක පිළිබද වෙනස්කම් ඇති වු විට,
II. මුද්‍රණකරුගේ හෝ ප්‍රකාශකගේ ලිපිනයන් වෙනස් වු විට,
III. පත්‍රයේ අයිතිකරු වෙනස් වු විට හෝ ඔහු රටින් බැහැර වු විට,
IV. පත්‍රය මුද්‍රණය කරනු ලබන මුද්‍රණාලය වෙනස් වු විට,
V. පත්‍රය ප්‍රසිද්ධ කරන ස්ථානය වෙනස් වු විට,
VI. ප්‍රවෘත්ති පත්‍රයේ නම වෙනස් වු විට.
3. පළකරනු ලබන සෑම පත්‍රයකම සහ ඊට සම්බන්ධ සෑම අතිරේකයකම අවසානයේ පහත සදහන් විස්තර අඩංගු කළ යුතුය.
I. මුද්‍රණකරුගේ පෙළපත් නම ඇතුළු පුද්ගලික නම සහ පදිංචි ස්ථානය,
II. ප්‍රකාශකගේ පෙළපත් නම ඇතුළු පුද්ගලික නම සහ පදිංචි ස්ථානය ,
III. ප්‍රවෘත්ති පත්‍රය මුද්‍රණය කරනු ලබන නිවස හෝ ගොඩනැගිල්ල පිළිබඳ සහ එම පත්‍රය ප්‍රකාශයට පත් කරනු ලබන නිවස හෝ ගොඩනැගිල්ල පිළිබඳ සත්‍ය විස්තරය.
IV. පුවත්පත ප්‍රකාශයට පත් කරන සතියේ දිනය, මාසය සහ වසර.
